ГОРАДЗУЛЬ Горадзуль - журнал, кöда петö миян велотчанiнын асланым роднöй коми-кыв вылын. Эта листбок журналлöн мийо чукортiм быдкодь гижöттэз коми-пермяцкöй кывлöн лун кежö, и шуим мийö сийö "Ась горалö коми кыв". Эта кад кежö миян школаын чулалic быдкодь мероприятие. Каждöй велöчись и велöтicь школаын тöдö и вежöртö коми-пермяцкой кывсö. Сiя миянлö öддьöн дона, мийö радейтам велöтны ассиным кывсö. Мунам одзлань и висьтасям и челядь, и школа, и мероприятиез и модiк историяез йылicь.
ВИЛЬ ГОД ШКОЛАЫН ДА РАЙОНЫН.
Виль год кежö челядь миян школаын пондiсö лöсьöтчыны одз. Велöтiсö танеццез да песняэз, учöтжык челядёккез мöдöтiсö класс, споритiсö и лöгасьлiсö öтамöд вылö, унажыкыс ны коласiсь керисö костюммез. Медбур костюммез вöлiсö Хомяков Сашалöн 1 кл, Чеботкова Анюталöн 2 кл, и Никонов Ванялöн, 1 кл. Челядёккез понда игровöй программа чулöтiсö велöтiссез. Сiдз Алексеева В.Л. орсiс роль Кикиморалiсь, Лешакöн вöлi Рукавишникова Г.В., а Баба-Ягаöн – Коколева Е.Н. Петрова Л.В. вöлi ведущöйöн.
Шöрöт классэзiсь челядёккез готовитöмась вильгодся программаэз: «Битва экстрасенсов», 5 кл, «Поле чудес», 6 кл, «Любовь с первого взгляда», 7 кл., да пародияз артисттэз вылö. 
Ыджытжык классэз мыччалiсö главнöй роллез киноись «Ирония судьбы, или с лёгким паром». Диалоггезын роллезссö орсiсö Ипполит, Женя и Галя. Победителлезöн лоисö Гагарин Максим, 10 кл, Мартынов Андрей, 9 кл, и Дружинина Женя, 9 кл.
1996 годсянь миян школаын чулöтсьö «Конкурс двойников». Таво любуйтчимö Бурановаись баббезöн, гленитчисö группа «Демо», кывзiмö Глюкозаöс, Маша Распутинаöс, Филипп Киркоровöс да Верка Сердючкаöс. Эта конкурсын вермиссезöн лоисö Тетерлев Вася, 10 кл., Голубчиков Никита, 9 кл, и Чеботков Артём,8 кл.
Школаын вöлi организуйтöм «Конкурс рисунков» Виль год кежö. Кружоккезiсь челядёккез участвуйтİсö районнöй конкурсын «Парад Дедов Морозов и Снегурочек».
Декабрь 26 лунö Кöч посадын чулалiс районнöй ёлка. Миян школаись ветлiсö дас морт. Этö нiя, кöдна участвуйтiсö быдкодь олимпиадаэзын да конкурссэзын.
СВЯТÖЙ ВАЛЕНТИНЛÖН ВЕЖАЛУН.
Бур часöн, бытшöм лунöн, коми йöз! Счастливöй праздникöн, тiянöс! – эна кыввезöн пондöтчис Пелымскöй шöрöт школаын мероприятие, кöда посващайтчис Святöй Валентинлöн вежалунлö. Эта вежалуныс любитiссезлöн да радейтiссезлöн локтiс миян дынö ылiсь Америкаись, но паськыта отмечайтöны сiйö и миян странаын.
Эта рыт коста чулалiсö уна интереснöй конкурссэз. Челядь поздравитiсö öтамöдöс эта вежалунöн. Колö висьтавны, что эта конкурсыс чулöтсис коми- пермяцкöй кыв вылын. Челядь мыччалiсö ассиныс таланттэзнысö да кужöммезнысö:
- кинлöн сеяныс петiс чöскытжык?
- кин бытшöма сьылас частушкаэз или песняэз коми-пермяцкöй кыв вылын?
- кин буржыка чулöтас коми-пермяцкöй орсан?
- кин кужöмöн йöктыштас тупи-тапсö?
Челядь удивитiсö жюрисö. Эта рыт кежö готовитöмась быдкодь блюдоэз: тшакись пельняннез, кöктоинicь пöжöм каша, сола тшак, пиканicь сеян, нельки блиннэз пöжалöмась. Öддьöн гленитчис, кыдз челядь сьылicö Р.Мелехинлicь песня «Окала бöра», орсicö быгрöтчанöн да йöктiсö радöн. Эта бöрын нежнöя висьталicö öтамöдлö комплименттэз.
Ыджыт аттьö колö висьтавны ведущöйезлö: Аганина Настялö да Хомяков Владиклö (10 классicь). Медъена гленитчисö зоночкаэз: Худяков Денис да Роготнев Коля (9 кл.), Чеботков Артем да Мехоношин Сергей (8кл.). А Хомяков Владик наизусть лыддьöтic Н. Поповлicь кывбур любитöм йылicь «Эн юась», орсiс гитара вылын и сьылiс песня «Сьöлöмгаж». Быдöс вермиссесö видзчисисö козиннэз. А сэсся пондöтчис дискотека. Вот сэтшом гажöна гажöтчисö ыджытжык классэзiсь велöтчиссез миян школаын.
ВЫСОЦКÖЙЛÖ – 75!
Высоцкöй Владимир Семёнович чужис январь 25 лунö 1938 годö. Эта мортыс öддьöн интереснöй. И медбы челядь буржыка тöдiсö сылiсь творчествосö, миян школаын чулалiс «Литературнöй час», кöдö организуйтiсö библиотекаррез школьнöй да сельскöй библиотекаэзiсь. Тетерлева Н.И. висьтасис биографиясö, а Станкевич Л.Н., кöда орсiс Высоцкийлiсь рольсö, отвечайтiс вопроссэз вылö, кöднö сеталiсö челядьыс. Занятие коста орсiс музыка, челядь кывзiсö Высоцкийлiсь сьыланкыввез, 6 классiсь нылочкаэз керисö сы «Гимнастика» песня сьöртi зарядка, быдöнныс видзöтiсö презентация «Высоцкий – челядьлö». Эта дата кежö библиотекаын вöлi керöм выставка, а школаын оформитöм стенд «Актёр, бард, поэт». (Фото вылын челядь кöдна керисö зарядка да Повраницын Никита орсö Высоцкöйлiсь рольсö.)
ЛОÖ ЧОЖÖСЬ, ВЫНАÖСЬ И ЗДОРОВÖЙÖСЬ!
Школаын лöнь, только спортивнöй залын шум, челядь ёна ыксöны. Этö сiдз, кыдз эстöн мунöны спортивнöй соревнованнёэз: то «Весёлöй старттэз», то баскетбол, то силовöй гимнастика. Эта бöрсянь челядь бöрйöны, кин медбурыс вöлi вермасьöммез коста, видзöтöны результаттэсö спортивнöй стенд вылiсь. Миян школаись челядьыс участвуйтöны и районнöй соревнованнёэзын, и краевöй олимпиадаэзын. Школаын соревнованнёэз коста медчожа котрасьöны: Никонов Максим,7 кл., Петрова Вика, 6 кл., Роготнев Коля, 9 кл., Чеботкова Таня, 8 кл. Медвынаэз коласiсь районын участвуйтiсö Худяков Влад, 9 кл. и Аганина Диана, 7 кл. Таво районнöй спортивнöй олимпиадаын медодз места босьтic Роготнев Коля. Сiя шедтİс 81 балл и шедiс краевöй олимпиада вылö.
Миян школаись челядьыс занимайтчöны не только спортöн, но и ветлöтöны быдкодь кружоккезö да участвуйтöны уна творческöй конкурссэзын.
(Роготнев Коля - краевöй олимпиада вылын)
