Горадзуль
ГОРАДЗУЛЬ
Миян школаын петö журнал «Горадзуль», кöдö челядьыс лöсьöтöны асланым роднöй коми-пермяцкöй кыв вылын. Унажык уджсö журнал лэдзикö керö Костарева Раиса Васильевна. Ыджыт спасибо сылö эта журнал понда. Эта листбок вылын мийö пондам гижны Пелымской шöрöт школа йылiсь велöтчиссезлöн да велöтiссеезлöн кыввезöн. Висьтасям история йылiсь, сералыштам учениккез вылын да гижам велöтiссеез йылiсь, кöдна уджалöны миян школаын.
ПЕЛЫМСКÖЙ ШÖРÖТ ШКОЛАЛÖН ИСТОРИЯ.
 1902 годö Пелымын оссис кыккласснöй земскöй школа, кытöн заведующöйöн вöлi Боголюбов Афонасий Тимофеевич. Кöр пондöтчис первöй мировöй война, сiйö босьтiсö война вылö.Гражданскöй война коста школаын занятиеэз эзö вöлö.
1929-1941 годдэзö школаас уджалiс Петров Прокопий Васильевич, кöда орöтic ассис олансö война вылын.
1942-1944 годдэзö занятиеэз чулöтiс Гагарин Алексей Антонович.
1945 годсянь школаын уджалiсö Коколеввез Егор Никифорович да Анна Ивановна.
 1962 годö оссис виль зданнё Пелымскöй восьмилетньöй школалöн, кöдö строитicö уджалiссез Юрлинскöй СМУись. Сэк öтлаасисö Отопковскöй да Петуховскöй семилетньöй школаэз. Школаын велöтчисö учениккез нельки кык дас деревняись этö и Пелым, Отопково, Петухово, Пыстогово, Беленьково, Куделька, Урья, Карчинск, Кузьмино, Зыряново, Гордеево, Тубызово, Прошино, Жуково. Велöтчиссез вöлicö 400 мортся унажык. Школа быдтic аслыс карч. 1982 годö оссис Пелымскöй шöрöт школа. Уджалiсö сэтöн юралiccезöн Мошегов Аркадий Васильевич, Пономарёв Виктор Михайлович, Чеботкова Алевтина Егоровна.
1987 годсянь и öнöдз юралiсьöн школаас уджалö Тетерлев Николай Степанович.
МЕНАМ МЕДДОНА ПРЕДМЕТ!!!
Школаын мийö велöтам уна предметтэз. Менам меддона предметö – география. Географияöн миянöс велöтö Жанна Валерьевна. Сiя миянлö висьтасьö вулканнэз, мореэз, океаннэз, землетрясеннёэз йылiсь. Меным интересно этö быдöс тöдны. Кöть и геграфия сьöкыт, но меным сiя гленитчö.
Никонова Света, 7 класс.
Менам уна любимöй предметтэзö, но роднöй литератураыс мед ни бур. Эта урок вылын мийö уна тöдам вильсö коми-пермяцкöй писателлез да поэттэз йылiсь. Лыддьöтам быдкодь произведеннёэз да стиххез. Уроккез вылын мийö пыр серавлам, переживайтам геройез понда. Ме любита этö предметсö сiйöн, что некытшöм сэтшöм произведеннё абу, кыдз «Ва увтын пос». Только эта произведеннёын ме тöдi, кытшöм бытшöма вермöны гижны миян коми-пермяцкöй писателлез. Этö произведеннёсö мийö велöтiм 6 классын, но ме сiйö некöр ог вунöтчы.
Никонова Ирина, 7 класс.
Быд челядёклöн эм школаас любимöй предмет. А меным гленитчö физкультура. Эта урок вылын орсамö баскетболöн и мöдiк играэзöн. Мукöдпырся котрасям öтöрын или орсам волейболöн. Этасянь и ме öддьöн радейта физкультура.
Коколева Рита, 7 класс.
Öнi первöй год велöтам физика. Кыдз первöй урокыс лоис, меным сiя сразу гленитчис. Эта предметыс кокнит. Решайтам быдкодь задачаэз. И учительницаыс добрöй, оз видчы, если кин мый не сiдз керас.
Рукавишникова Алена, 7 класс.
МИЯН ШКОЛА КЫКДАС ГОД БÖРТI!!!
 Ме думайта, что кыкдас год бöртi классэзын лоасö электроннöй доскаэз. Школаыс лоас 5-этажнöй. Öтiк этаж вылас – бассейн, сэтöн дельфиннэз. Быд велöтчисьлöн парта вылын компьютер. Книгаэз лоасö тожö электроннöйöсь. Велöтчиссез пондасö ветлöтны учöтик папкаокезöн, кытчö тöрасö быдöс школьнöй принадлежносттез. Лестница туйö лоас лифт. Челядьлöн лоас öткодь форма. Ыбöссэз стекляннöйöсь, и пондасö оссьыны асьныс, кöр ны дынö сибöтчас морт. Ме бы тожö велöтча сэтшöм школаын.Гижöм 2003 годö.
СЕРАЛЫШТАМ!!!
Велöтчиссез кыввез дорын сералыштам:
***
«Миян школаын эм дирекция, секретарша да мöдiк кабинеттэз!»
***
- Мыля Пелымыс сiдз шусьö?
- Пелымас морттэслöн эмöсь пеллэз вот и шусьö Пелым!
***
«Кудымкарын эм грамматическöй театр!»
****
«Вöрпöтка вöлi сьöд, а сылöн чужöмас вöлiсö гöрд пятнооккез»
***
- Аркмöтö кывсянь «ар» прилагательнöй.
- Арскöй.
Выпускниккез йылiсь частушкаэз:
***
Игорь, Гена да Артем ёнаöв бöбалiсö.
Игорь усис, Гена доймис, а Артемлö ена дöнзис.
***
Миян Юля оз серавлы, лöг, серьезнöй сiя пыр.
Но мыччалан сылö чуньтö – пондас ваксьыны лынтыр.
***
Классаным эм зонкаок, шуöны сiйö Витёк.
Öддьöн бöб, но уджалicь, лоас, натьтö, юралiсь.
Витя миян медумнöй, дзик профессор, деловöй.
Но а нывкаэзicь полö, сэтшöм сiя … дорогöй.
***
Дышкодь Ваня пыр бöбалö, оз кывзы урок вылын
Сiйöн ручкаэз öшталö упражненне кошшытöн.
***
Ой, Игорь тэ миян, лöзкодь тай вешьяна.
Парта сайын пукалан, кыдз тай обезьяна.
***
Алöй мак, алöй мак алöйöн цветитö.
Миян Миша Коколев сизимдас любитö.
***
Тэ Ваня, ме Ваня, кыкнанным ми Ваняэз.
Талун рытнас петаламö кошшыны параэз.
|
